بْــــــــــحـــــــــــــبــــــــــــــــــــِّك

مِين اللي عنِّك قال خَتْيَرْتِ ؟

بَعْدِك صبيِّه وْ ما تْغَيَّرْتِ

بْقَدَر ما زهَّرُوا الأزهار

أكتر من الأزهار زَهَّرْتِ

***

وْ تَ يِسرْقِك نيسان من آدار

قلِّك تَعِي .. دَخْلِك تْأَخَّرْتِ

وْ من فجعْتُو قللِّك قَمَر نوّار

بْطلِّق الوردِه وْ بعْملِك مرتي

***

يا وردْتي .. بَعْدِك مَلانِه قْمار

غار الندى لمّا تْحَمَّرْتِ

و انْشَلْحِت عْلَيكِ وْراق الغار

زنّار .. تَ فيها تْزَنَّرْتِ

***

وْ تَ نْقول صرتِ بآخر المشوار

بْحبِّك بحبِّك .. وَين ما صِرْتِ

بْحبِّك نَغَم تايِه من الأَوتار

بْسَهْرة قديمِه بْلَيْلْها سْهِرْتِ

بْحبِّك حْكاية عطر للعطّار

لَمّا بَسَاتين الصِّبا زرْتِ

بْحبِّك بْلوزِه , وْ كان فيها زْرار

صغرِت عْلَيكِ بَعد ما كْبرْتِ

بْحبِّك دُمُوع .. وْ بْعشَقِك آثار

بِتْياب فيها عطرِك أْسَرْتِ

بْحبِّك وَدَاع .. وْ بِسْأل البَحَّار

ان كَنِّك مَعُو باللَّيل سافَرْتِ

وْ منِّك إذا ما ضلّ خَمرة وْ نار

بْكاس الْ بِقَلْبو تمِّك عْصَرْتِ

بِسْكَر عَ ريحة جرّة الخمّار

وْ بْقول يا عَيني – إذا سْكرْتِ

وْ حتّى مَ تُوعِي , وْشُوف نَومِك طار

وْ خسِرْت عمري , وْ عُمرِك خْسرتِ

متل العِنَب يا رَيت فينا صار

خمَّار يِعْصرنا بْجرّة خَمر ..

وْ تْدُوب آخرتِك بآخرتي